Waalaloo jaalalaa

WALALOO JAALALA (1Phex4:8) (Madda: Walaloo afooraa kutaa 29ffaa) • Jaalalli hin hinaafu obsaaf danda’aadha • Namas hin lafafu furtuu waan hundaadha • Amantii qabaachuu jaalalaan ibsama • Ulaagaan namummaas isaan madaalama • Waan hundumaa darbuuf obsa barbaachisa • Jaalallis furtuudha cubbuu namaa dhoksa • Amantiin hundeedha qabaachuudhaaf obsa • Seeras raawwachuudha jaalalli sirriinsaa • Bantuun mana waaqaa jaalala ta’uusaa • Nu duraa dhokatee maaliif nu rakkisaa? • Furtuun waan hundaadhaa jaalalaa hubadhaa • Hojii kam keessaattuu dursa isaaf laadha? o Maalummaa jaalalaa beeknee adda baafannee o Wal-haa jaallannu kaa hundinuu hoo’isnee o Dhugaan wal-jaallanna onnee irraa kaafnee o Boqonnaa maaf dhabnaa jibba boraafannee. • Bakka kamitti iyyuu jaalalli utubaadha • Jaalalli dhibamnaan jireenyi gubiidha • Burqituunsaa gognaan onnee keenya keessaa • Tajaajilli keenyas maal waa’ee nuuf baasaa? o Har’a mucaan namaa jibba gudunfatee o Jaalala waaqa isaa raawwatee dagatee o Daandii gubbaa goree kiyyoo waliif mara o Farda amminaa koree wal-miidhuuf jarjara • Onneen mucaa namaa hinaaffaan guutamee • Hinaaffaan baay’annaan jaalallis dhabameee • Jireenyis ulfaatee hundumtuu rakkanne • Nu milladhu Gooftaa nu fala isaa dhabnee o Jaalalli maseennaan jibbi lakkuu dhale o Obbolaan walii isaa ajjeesuu eegale o Intallis haadha ishee reebuuf itti gamti o Kun hunduu kan ta’eef jaalalli gu’eeti • Maatiin mana tokkoo argituu wal-jibbee • Ilmis abbaa ajjeesuuf maggalee itti sirbe • Garaan gargar ba’ee hunduu faffaca’e • Jaalalli waan dhibeef nageenyi manca’e o Yaada abbaaf haadhaatu garaagara cabe o Hunduu walii isaatti boqochuu dadhabe o Qabeenya kuusanii daa’imas horanii o Jiraachuu dadhaban jaalala dhabanii • Mana seeraa dhaquun nu hiikaa jidhanii • Fuula abbaa murtii wal-dhaabachiisanii • Qabeenyaa isaanii garaagar qooddatu • Daa’imman isaaniis iyyummaatti laatu. o Jaalalli waan gogeef burqaan jibbaa yaa’e o Kanaaf maatii nagaan addaan bittinnaa’e o Jaalala isa dhugaa kottaa wal-jaallannaa o Maaf addaan facaanee taana irbaata diinaa • Korojoo isaanii jibbaan guuttatanii • Yeroo itti tufani hunduu tuffatanii • Isaan hin beekanii yaa abbaa waan godhani • Yaa abbaa kana dhiisiif itti hin lakkaa’inii • Jechuun nu simateem waaqni nu jaallatee • Jaalalaan nu waamee jireenyaaf nu laate o Yeroo isaan reeban lafarra harkisanii o Fannotti olbaasani Gooftaa fannisani o Fuula Heroodoosiif Philaaxoos dhaabatee o Jibbaan yoo himatan jaalalaan simatee o Jibba bara dheeraa gidduu isaanii ture o Gidduudhaa balleessee jaalalaan ijaare. • Egaa maaf dagannaa jaalala waaqayyoo • Jaalala isa dhugaa dirree qaraaniyyoo • Kan diina qaanessee itti huwwise leeyyoo • Ilmaan namaa hundaaf kan ta’e hidhannoo. o Maaf hin dhagaa’amuu inni nu keessatti o Jaalaluma keenyaaf ol-ba’eem fannootti o Leenginoosiin illee namticha isa jaamaa o Waraannaan fayyiseem itti hin yaanne hama. • Jibba jaalalaani akkanaan deebisu • Waan gaarii godhanii nama gaabbisiisu • Utuu akkas goonee jaalalli wal-hora • Dogoggora isaa irraa hundi baree gara. o Akkamiin jiraadhu barri natti ulfaate o Hin jedhin namana ofii of-dagattee o Of-gaafadhu malee maal irraa akka kufte o Jaalala waaqa kee eessatti akka gate • Addunyaa haaraani nuuf jedhee hin uumamne • Biiftuun dabalamee Addeessi hin dhabamne • Halkan jijjiiramee guyyaan lama hin taane • Waanti haaraan ta’ee mee maaltu jiramee. o Barri barumaadhaam lakkoobsa dabale o Hojii keenyaaf jedhee nutti ulfaate malee o Qomaaf sanyiidhaani namni waan wal-qoodeef o Jireenyis ulfaateem jaalalli waan badeef. • Mee of haa gaafannu rakkoof hanqina isaa • Kan sichiif haa yaannuu waanta darbe dhiisaa • Kottaa onnee keenya jaalalaan tarsaafnaa • Burqituu jaalalaas dhugnee dheebuu baanaa o Furmaata isaa beekuuf kottaa kaa wal-geenyaa o Tokkummaan duuchinaa burqituu ammeenyaa o Yoos nuuf qajeelaatii haalli jiruu keenyaa o Ofumaa hin komannuu teenyee bara keenya • Egaa obbolaa ko hunduu wal-jaalladhaa • Amanamummaadhaan wal-wajjin jiraadhaa • Baras mo’aa bulaa baraaf hin bulinaa • Gochaa karaa dalgaaf bakka hin kennina. o Waaqa abboota koof galanni haa ta’u o Jaalalli inni dhugaan nu keessaa haa yaa’u o Hojii nuti goonus waaqatti haa tolu o Waaqnis nu haa godhu saba walii galu. Yoo itti walii galttan "SHARE" gochuun hiriyyoota keessaniin akka geessan jaalala gooftaan isin gaafana. Yaada qabddanis barreessuu hin dagatina.